Sunday, April 23, 2006

गझलेसारखी...पण कविताच ...

-
बाहेरून तर सारे छान आहे
मनातले खोटे समाधान आहे ।

पैशाला हारतुऱ्याचा मान आहे
फासावर गरीबाची मान आहे ।

मेघ बरसून नुकताच गेला
चातकाला प्रेमाची तहान आहे ।

मिळवू शकत नाही नजर मी
डोळ्यांमध्ये अनोखे आव्हान आहे ।

जहरी साप फिरतात मोकळे
बांधले साखळीने इमान आहे ।

पांढऱ्यावर काळे करावे किती
मनात विचारांचे तुफान आहे ।

थांबवू का लिहिणे काही क्षण मी
उलटतो भरलेले पान आहे ।

-प्रणव