...चालले
-
दगडाच्या मूर्तीला ते, दान मागूनी चालले
दारावरच्या याचकाला, बघता न बघूनी चालले ।
करण्या रिता घडा पापांचा, लोक तिर्थक्षेत्री चालले
माळ हाती प्रभूनाम मुखी, विचार अजूनी चालले ।
का मी पिंजऱ्यात सोन्याच्या, एकटाच अडकलो
मुक्त गगनी सर्व मित्रपक्षी, माझे उडूनी चालले ।
एकाला झाका दुसऱ्या उघडा, दिवस एकसूरी झाले
जणू काही सारे बगळे, एकामागूनी चालले ।
नाही एकटे प्रवासी आपण, समुद्रावर रेतीच्या
अनेक काफिले प्रतिदिनी, वाळवंटातूनी चालले ।
लढू तरी कोणाशी आता, कोर्टात आयुष्याच्या
माझे सारेच दावे ते, फ़ेटाळूनी चालले ।
जगण्यासाठी दमडी कमावता, खूप काही गमावले
पोटासाठी काम माझे, मन मारूनी चालले ।
-प्रणव